Bu Emily'n defnyddio ei sgiliau TG i helpu teuluoedd yn Southwark

"Rwyf wedi gweithio ym maes cysylltiadau cyhoeddus elusennau ers pan oeddwn yn 16 oed, hynny ar ôl gadael yr ysgol yn gynnar oherwydd salwch. Fe wnes i gychwyn gweithio i'r Gymdeithas Pobl Ifanc sydd ag M.E., ac yn ystod y pum mlynedd a dreuliais yno, bues i'n brwydro i ennill hawliau i blant sydd â'r salwch anablu hwn - gan weithio i wella'r gefnogaeth sydd ar gael i deuluoedd sy'n byw gydag M.E. ac yn helpu pobl ifanc i ddod o hyd i gyfleoedd i oresgyn eu sefyllfa gorfforol a dod yn rhan o'r gymuned.

"Yn ystod y cyfnod hwnnw dysgais lawer am y problemau bob dydd sy'n wynebu teuluoedd a'r gefnogaeth sydd ei hangen arnom i gyd ar brydiau. Ar ôl i un o'm cymdogion ddweud wrthyf am Home-Start, ac ar ôl i mi gyfarfod Sherry, Rheolwraig y Cynllun, rôn i'n gwybod yn syth fy mod am weithio i'r elusen.

"Dwi wedi caru plant erioed. Fi yw "Modryb Emily" i ferch fy chwaer a dau o blant fy ffrind gorau. Dwi wrth fy modd yn clywed am eu hanturiaethau - er mor ifanc, maen nhw'n gallu bod yn ddrygionus iawn ar brydiau! Weithiau dwi ddim yn gwybod sut mae eu mamau'n ymdopi. Dwi wedi cael boddhad mawr o fod yn gefn i'm ffrind ers iddi ddod yn fam, ac o geisio ei helpu i ymateb i'r her o fagu plant. Dwi hefyd wedi mwynhau gwylio'r plant bach yn tyfu. Mae'r holl brofiad wedi dangos i mi un o'r rhesymau pam fod Home-Start mor llwyddiannus: mae gwerth ein gwaith yn amlwg i'n gwirfoddolwyr yn ogystal â'n teuluoedd. Oherwydd fy anabledd, dwi'n gweithio gartref drwy'r amser, gan ddefnyddio'r rhyngrwyd a'r ffôn. Mae Rheolwraig a Chydlynwyr y Cynllun yn barod iawn i ddod i'm cartref i gynnal cyfarfodydd gyda mi. Byddai'n amhosib i mi wneud fy ngwaith heb gefnogaeth o'r fath, a dwi wir yn mwynhau bod yn rhan o sefydliad teuluol sy'n gyfeillgar iawn."

Richard - 'swydd bob dydd' yn helpu Home-Start yn Efrog

"Fe glywais am waith rhagorol Home-Start yn y lle cyntaf gan ffrindiau sydd wedi bod yn ymwelwyr cartref," meddai Richard Baldwin. "Fel rhywun sy'n gweithio'n llawn amser, doedd hi ddim yn hawdd i mi wneud gwaith o'r fath, ond fe welais i hysbyseb yn y papur newydd lleol yn gofyn am Gadeirydd i Home-Start Efrog.

"Mae llai na blwyddyn ers i mi ddechrau'r gwaith, ond dwi'n mwynhau cydweithio gyda'r staff rhagorol - Celia, Gail a Hilary - a chyda'r gwirfoddolwyr.

"Mae'r ffaith fy mod yn ennill fy mywoliaeth fel Pennaeth Gwirfoddoli Cronfa Ganser Macmilan wedi fy helpu i ddeall cymhellion gwirfoddolwyr a'r cyfleoedd sydd ar gael iddynt. Dwi'n gyfrifol am tua 70,000 o wirfoddolwyr sy'n cyflawni dros 100 gwahanol fath o dasgau. Weithiau mae syniadau pobl ynglŷn â'r hyn y gallant ei wneud fel gwirfoddolwyr yn gul iawn, felly mae'n bwysig ystyried amrywiaeth eang o gyfraniadau posib.

"Cyn belled ag y mae Home-Start yn y cwestiwn, rydym yn tueddu i recriwtio gwirfoddolwyr i ymweld â chartrefi ac i wneud gwaith codi arian achlysurol. Fodd bynnag, mae amrywiaeth o gyfleoedd eraill ar gael i wirfoddolwyr, yn cynnwys gwaith gweinyddol, y gwaith o drefnu apwyntiadau gyda theuluoedd a darpar wirfoddolwyr, mynd â theuluoedd allan am y diwrnod, gyrru, rhoi cyngor ar fudd-daliadau, trefnu cyhoeddusrwydd, a chyflawni gwaith ym meysydd iechyd a diogelwch ac adnoddau dynol. Byddwn i'n cynghori pobl sy'n ymwneud â'r cynlluniau, a darpar wirfoddolwyr, i ddefnyddio'u dychymyg ac i beidio â bod ofn mentro. Mae pawb yn elwa yn y pen draw - boed yn wirfoddolwyr neu'n deuluoedd sy'n derbyn cymorth."

Kate - orielau celf ym Mrwsel, Gardd Monet yng Ngiverny...a Home-Start Telford a Wrekin

"Ar ôl i mi ymddeol yn gynnar fel athrawes, rôn i'n meddwl y byddwn i wrth fy modd yn ailaddurno'r tŷ, yn gosod trefn ar yr ardd ac yna'n cael y cyfle i ymweld â'r holl lefydd a fu o ddiddordeb i mi erioed, fel gardd Monet yng Ngiverny ac orielau celf Llundain, Lerpwl, Paris a Brwsel," meddai Kate Bevan. "Fe lwyddais i wneud yr holl bethau hynny a'u mwynhau, ond rôn i'n dal i deimlo bod angen i mi wneud rhywbeth arall a gwneud gwahaniaeth i fywydau pobl eraill.

"Roedd fy ngyrfa fel athrawes yn amrywiol iawn, a bues i'n gweithio gyda phlant mewn ysgolion a chyda myfyrwyr mewn coleg a phrifysgol. Wrth gysylltu â REACH, sef y sefydliad sy'n helpu pobl sydd wedi ymddeol i gael hyd i waith gwirfoddol, penderfynais y byddwn yn hoffi trio rhywbeth ychydig yn wahanol.

"Roedd pwyslais Home-Start ar gefnogi teuluoedd a phlant ar lefel unigol yn apelio'n fawr. Fe ymunais â'r pwyllgor rheoli ym 1999, ac fe ges i foddhad mawr o fod yn aelod o dîm oedd yn cyfrannu gymaint at les rhieni a phlant. Dwi wedi bod yn is-gadeirydd Cynllun Telford a Wrekin, ac ar hyn o bryd fi yw cadeirydd y Cynllun. Mae'r diwrnodau hyfforddiant sydd ar gael i aelodau pwyllgorau wedi cynnig y cyfle i mi ddysgu am waith pwyllgorau, yn arbennig ym meysydd codi arian, datblygu polisïau a gweithio fel rhan o bartneriaeth.

"Dwi wedi gwneud llawer o ffrindiau ers dod yn rhan o Home-Start, a dwi'n gwerthfawrogi'r ymrwymiad cyffredinol sydd gan bawb i bwysigrwydd blynyddoedd cynnar. Mae Home-Start yn sefydliad sy'n gwerthfawrogi pawb ac sy'n galluogi pobl i ganfod eu talentau cudd."

Barry - yn manteisio ar 30 blynedd o brofiad

"Wrth i mi nesáu at oedran ymddeol fe wnes i ddechrau chwilio am gyfle i helpu sefydliad gwirfoddol," meddai Barry Newland. "Pan oeddwn yn ifanc es ar gyfnod o Wasanaeth Gwirfoddol Tramor ac rôn i wedi bod yn weithiwr ieuenctid gwirfoddol, ond bellach rôn i'n chwilio am rywbeth a fyddai'n fy ngalluogi i ddefnyddio'r profiadau busnes a bywyd a oedd wedi dod i'm rhan tros gyfnod o fwy na 30 mlynedd.

"Roedd REACH yn gallu cynnig amrywiaeth eang o gyfleoedd trwy gymharu fy sgiliau, fy mhrofiad a'm gobeithion â manylebau swyddi amryw o sefydliadau gwirfoddol. Un o'r rhain oedd Home-Start Gogledd-Ddwyrain Swydd Caerwrangon. Fel rhywun a oedd wedi ystyried ei hun yn rhiant "cyffredin" ac a oedd wedi dilyn gyrfa ym myd busnes (er gwaethaf cael fy nisgrifio fel "gweithiwr cymdeithasol" yn ôl proffilio personoliaeth yn gynnar yn fy mywyd gwaith), doeddwn i ddim yn meddwl y byddwn i'n gallu cyfrannu llawer at waith o'r fath.

"Fodd bynnag, fe gefais fy argyhoeddi fel arall gan dair menyw. Mae Rachel, fy merch, yn Weithwraig Gymdeithasol â phrofiad o helpu plant ifanc sydd wedi cael eu cam-drin. Roedd hi'n credu bod Home-Start yn wych, ond roedd hi hefyd o'r farn y byddai'r elusen yn gallu elwa ar fy mhrofiad rheoli. Margaret Toole a Jean Watson oedd y ddwy fenyw arall. Mae Margaret wedi ymddeol fel arolygydd gyda'r Heddlu - hi yw cadeirydd Home-Start Gogledd-Ddwyrain Swydd Caerwrangon, a Jean yw'r cydgysylltydd. Ar ôl fy nghyfweliad cyntaf, doedden nhw ddim yn fodlon gadael i mi ddianc nes i mi addo y byddwn yn mynychu o leiaf un cyfarfod o'r Pwyllgor Rheoli fel ymwelydd.

"Digwyddodd hynny tua dwy flynedd a hanner yn ôl a dydyn nhw ddim wedi gadael i mi ddianc eto! Ond rhaid dweud fy mod yn mwynhau bod yn rhan o Home-Start. Mae'n sefydliad gwych sy'n llawn pobl ardderchog, ac ar lefel bersonol dwi'n dal i ddysgu am y ffordd orau i mi gyfrannu at waith yr elusen."

Back to Top